Dauðra manna bein.

Það er í sögnum, að ferðamaður einn, er var ofláti mikill, hafi eitt sinn um vetur komið að Stað á Ölduhrygg. Stóðu menn þá að grefti þar í kirkjugarði1, og höfðu líkmenn tekið gröfina. Hafði komið þar upp gröftur mikill, og lágu mannabeinin á grafarbarminum. Var í þeim banakringla ein mikil. Oflátungur þessi gekk að gröfinni og stakk broddstaf miklum, er hann gekk við, ofan í banakringluna, svo hún festist á broddinum, og mælti: „Svíradigur hefur hann verið sá arna, piltar!“ og hné niður dauður í sömu sporum.

Eftir sögn séra Friðriks Eggerz 1852.